Magtulóy po tayo sa opisyal na tahanan ng Class 1968 sa Marcelo H. del Pilar High School ng Malolos, Bulacan. Nilikha itong pook web para sa ating mga nagsipagtapos sa paaralang ito noong Abril 17, 1968. Bukas din ang pintuan sa ating mga guro, kapwa-estudyante ng paaralan noon at ngayon anumang taon nagtapos, at maging sa ating mga kamag-anak at kaibigan na nais pang magkaroon ng dagdag na impormasyon tungkol sa ating masaya at mahigpit na pagsasamahan. Para sa atin at sa kanila ang tahanang ito.

Bulacan High School (BHS) ang unang pangalan ng ating paaralan. Noong 1955, sa bisa ng Batas Republika 618, tinawag itong Marcelo H. del Pilar High School (MHPHS) bilang parangal sa kabayanihan ng dakilang propagandista at pambansang bayani na isinilang sa lalawigan ng Bulacan. At noong 1996, naging isang pambansang hayskul ito kaya tinatawag ngayong Marcelo H. del Pilar National High School (MHPNHS). Ngunit anuman ang maging tawag, nananatiling MHPHS ito para sa ating 711 nagtapos noong 1968 -- isang pangunahing pampublikong hayskul hindi lamang sa buong lalawigan kundi maging sa buong kapuluan.

Bukod sa mga palamuting makikita natin sa ating tahanan, mababasa rin, unang-una, ang mga pangunahing layunin at sagisag ng ating minamahal na Class 68:

Magsikap. Magtiyaga. Magtagumpay! Iyan ang naging sawikain o motto ng ating klase noong 1968. Iyan din ang magiging layunin sa pagpapatuloy ng pagsasamahan na ating gugunitain ngayong taong 2008 na Ruby Jubilee Year natin.

Luntian at Ginto. Mga opisyal na kulay na siya rin nating pinili noong 1968 at ipagpapatuloy sa panahong hinaharap.

Rosas. Opisyal na bulaklak ng ating klase. Bulaklak na kahit may angking ganda at bango--sagisag ng kagandahang-loob at ugali--ay mayroon ding mga tinik na handang magtanggol laban sa sinumang nais magsabog ng mga binhi ng ating pagkakawatak-watak.

Sa tahanang ito, magagawa natin na:

• makapagbalitaan (magtungo lamang sa silid BALITA) at malaman ang pinakahuling mga proyekto, magaganap na pulong, inihahandang pagtitipon o reunion, at iba pa.

• malaman kung sino-sino na nga ba ang bumubuo ng ating klase at nasaan na sila ngayon (sumilip sa silid ROLKOL).

• magunita kung sino na sa mga kaklase ang nauna nang lumisan sa daigdig na ito (alalahanin sila sa silid PAGLISAN).

• makabalik sa nakaraan at sariwain ang masasayang araw natin sa paaralan (tunghayan ang matatandang retrato sa silid NOON).

• mapansin ang naging mga pagbabago nating lahat pagkalipas ng maraming taon (buksan ang silid NGAYON).

At gaya ng maraming tahanan dito sa pandaigdig na web, mananatili tayong nakaugnay sa isa’t isa, saanmang sulok ng mundo, sa pamamagitan ng mga kaugnay na pook ng iba pang nagtapos, grupo man o indibidwal, sa MHPHS at patuloy na pakikipagtalastasan sa amin (nasa silid KONTAK). May nakalaan ding PANAUHIN para sa mga nais mag-iwan ng ilang mga salita matapos dumalaw sa tahanang ito.